, 
Түркияда наразы халық ең төменгі жалақыны көтеруді талап етті
Жексенбіде ірі түрік кәсіподақтары Стамбулдың азиялық бөлігінің көшелеріне елдегі гиперинфляция мен Түрік лирасының құнсыздануы кезінде 5 мыңнан астам адам наразылық білдіріп, көшеге шықты. Наразылық білдірушілердің басты талабы - ең төменгі жалақыны көтеру.
Euronews мәліметіне сәйкес, жыл басынан бері Түрік лирасы долларға қатысты құнының 43 пайызын жоғалтты. Қараша айында жарияланған ресми мәліметтерге сәйкес, Түркиядағы инфляция 21 пайыздан астам болған, бірақ оппозиция бұл сандар аз деп санайды және экономиканың нақты жағдайы төмен екенін ескертеді.
- Менің отбасымда жұбайым екеуміз бірге жұмыс істейміз. Біздің табысымыз пәтер жалдау ақысына, сондай-ақ коммуналдық қызметтерді төлеуге жетеді. Қазір өмір сүру өте қиын, өйткені біз ең төменгі жалақы аламыз. Егер бұл сома кем дегенде 5200 лираға (немесе 375 долларға) дейін көтерілсе, онда бізге оңайырақ болар еді, - дейді наразылық білдірушілердің бірі.
Экономикалық дағдарыстың ықтимал себептерінің бірі - республика үкіметінің Орталық Банктің саясатына араласуы, бұл негізгі пайыздық мөлшерлеменің төмендеуіне әкелді.
2019 жылдың шілдесінен бастап ел президенті Режеп Тайып Ердоған Орталық банк басшысын үш рет ауыстырды. 2021 жылдың қараша айының басынан бастап Түркияда екі рет жаңа Қаржы министрі тағайындалды.
