, 
Марапаттауда тұрған ештеңе жоқ – Дәурен Абаев
Президент әкімшілігі басшысының бірінші орынбасары Тәуелсіздіктің 30 жылдығына орай мемлекеттік наградаларды тапсыруға қатысты әлеуметтік желі қолданушыларының наразылығына қатысты пікір білдірді.
«Ашық диалог» бағдарламасының жүргізушісі қазақстандықтар Тәуелсіздік күнін тойлаудың кейбір тұстарын талқылауды жалғастырып жатқанын атап өтті. Соның бірі – наградаларды, медальдарды, ордендерді тапсыру. Желі қолданушылары марапаттардың тым көп екенін және бұл өткен дәуірдің мұрасы екенін айтады.
- Жүзден астам лайықты азаматты тәрбиелеп өсірген 30 жылдық тәжірибесі бар ұстазға медалінің құнсыз екенін түсіндіріп көріңіз. Өмір бойы кәсіпорында немесе ауыл шаруашылығында еңбек еткен 126 «Еңбек Даңқы» орденінің иегерлеріне немесе пандемиямен күресуді жалғастыратын жүздеген дәрігерлерге түсіндіріңіз. Бұл наградалар – қоғам мен мемлекетке олардың ерен еңбегі мен сіңірген еңбегі үшін берілген құрмет, - деді Абаев.
Сондай-ақ ол мемлекеттік қызметкерлердің 10%-дан азы марапатқа ие болғанын түсіндірді.
- Олар үнемі елдің көз алдында, сондықтан сол адамдар ғана марапатталған сияқты көрінеді, - деді Дәурен Абаев.
Оның айтуынша, шынымен де марапаттар әдеттегіден көп болған.
- Бірақ біз Тәуелсіздіктің 30 жылдығын күнде тойлай бермейміз. Наградтау, құрметті атақтар, ордендер, медальдар беру тәжірибесі бізге тән дәстүр емес. Ол бүкіл өркениетті әлемдегі тәжірибе. Бұл адамдарды жігерлендіру, үлгі ету мақсатында жасалып отыр. Бұл тәжірибеде тұрған ештеңе жоқ, - деді ол.
