, 
«Атамекен» – KOSGEB байланысы нығаюда
«Атамекен» Ұлттық кәсіпкерлер палатасының бір топ өкілі KOSGEB Шағын және орта кәсіпкерлікті дамыту мен қолдау ұйымында кәсіпкерлікті кешенді қолдау саласында тәжірибе алмасу үшін Түркияға іссапарға аттанды.
Анкара сапарының алғашқы күні KOSGEB топ-менеджерлерімен кездесуден басталды. Түркия «Бизнес министрлігінің» өкілдері компания тарихы туралы, бастапқы және жұмысы жолға қойылған бизнесті қолдау тетіктері жайлы жан-жақты баяндады. KOSGEB Президенті Режеп Бичер Түркия Республикасының Vision-2023, яғни жүзжылдығына дейінгі негізі бизнесті дамыту бойынша мақсатты көрсеткіштерден құралатын мемлекетті дамыту стратегиясы туралы баяндады. Көзделген мерзімге дейін экспорт көлемін 500 млрд. долларға дейін арттыру жоспарланған. Қазіргі уақытта бұл көрсеткіш 250 млрд. доллар, былайша айтқанда екі есе аз.
KOSGEB бизнестi дамыту ұйымы бастапқы және жұмысы жолға қойылған шағын және орта бизнес субъектілеріне тегін қызмет көрсетеді, мәселен жалпы тіркелген заңды тұлғалардың 99,82 пайызын құрайды. Елдегі жұмыс орнының 3/4 бөлігін шағын және орта бизнес өкілдері құрайды, онымен қоса ЖІӨ 50 пайыздық көрсеткіштен де жоғары, ал Қазақстанның ЖІӨ 17-23%. Сондай-ақ, KOSGEB ғылыми-зерттеу және инновациялық жобаларға ерекше көңіл бөледі. Түрік мемлекеті 2014 жылы KOSGEB ұйымына 210 млн. доллар бөлді. Бұл соманың шамамен 130 млн. доллары кәсіпорындарды қолдауға жұмсалды. Бұл сандық көрсеткіштер Түркияның кәсіпкерлікті дамытуға ден қойып отырғандығын айғақтайды.
«Түркиядағы шағын және орта бизнестің сатылануы біздің елдегімен ұқсас, дегенмен бұл жақта «микробизнес» деген ұғым қалыптасқан. Біз Ғылым, индустрия және технология министрлігімен де кездестік. Ерекше таңғалдырған жайт – министрліктің атауы болды. Түркияда ғылым мен бизнестің байланысы қаншалықты тығыз екенін көрсетіп тұр», – дейді «Атамекен» ҰКП Әкімшілік департаментінің басшысы Бауыржан Оразғалиев.
Индустрия және технология департаменті 2011 жылға дейін Өнеркәсіп және сауда министрлігінің құрамында болған. Аталған департаментті ғылым министрлігімен біріктіруге шешім қабылдаған түрік әріптестер ғылым мен заманауи технологияның және бизнестің ымыраластығын орната білген. Түркиялықтар министрліктің құрамын жаңарта отырып, ғылыми зерттемелерді түрлендіретін ғылыми-зерттеу орталықтарына 2,5 млрд. доллар қаражат бөлген. Машина жасау, химия өнеркәсібі салаларындағы ғылыми зерттеулер ерекше қарқынды.
«KOSGEB» Түркияның шағын және орта бизнесін дамыту ұйымында тәжірибе алмасу үшін өткізіліп отырған іссапар бағдарламасы бір аптаға жалғаспақ. Түркия экономикалық әлеуеті бойынша Еуропада және әлемде жетекші орын алады. Экономиканы дамытудың тиімді жолының бірі шағын және орта кәсіпкерлікті үдету екені белгілі. Бизнес саласындағы түрік эксперттерінің бай тәжірибесі Қазақстан мамандары үшін маңызды.
